vra nie vir wie die mooi syserp met dieremotiewe is nie. Sy is doodseker dis nie vir haar nie en sy is redelik seker dis nie vir sy ma of sy suster nie. Miskien moes sy hom lankal hierheen gebring het. Miskien is dit nodig om altyd iemand in ander omstandighede ook te leer ken; die bekende omstandighede kan ’n mens se waarnemingsvermoëns laat afstomp.
Toe die son in die see begin wegsak, sit hulle op Frans se balkon met ’n yskoue bottel Franse sjampanje. Nicolene het hom van die winkelsentrum af gebel en hy het dadelik vir Hendrine laat weet om soontoe te kom.
Nicolene moet glimlag toe Hendrine ná ’n paar minute half uitasem by die voordeur inkom, asof sy bang is sy verpas ’n trein. Hulle het die vorige aand vlugtig by die troue ontmoet, maar sy stel Andrew weer aan Hendrine voor. Toe kan sy gelukkig terugsit en stil die sonsondergang geniet, terwyl Hendrine vir Andrew onder kruisverhoor neem. Tot haar verbasing lyk dit of Hendrine Andrew meer amuseer as irriteer. Miskien is dit haar lewenslus. Hy was nog altyd aangetrokke tot mense met hope energie.
En toe Frans later voorstel dat hulle vir Andrew op ’n toer van die stad se vermaaklikheidsplekke neem, kan Nicolene net knik. Hulle kan net sowel gaan. Hy gaan dit beslis nie maak as hy nog ’n aand op die plaas of saam met die familie moet deurbring nie.
Hoe later dit word, hoe meer ontspanne en geselserig raak Andrew. Frans en Hendrine ken duidelik al die nuutste kuierplekke en oral ontmoet hulle mense wat van oor die wêreld kom. Nicolene kyk later oormekaar, maar Andrew het twee landgenote raakgeloop, en toe hulle ná ’n paar minute uitvind dat hulle gemeenskaplike kennisse het, begin hulle met nog groter oorgawe gesels.
Die plaas is doodstil toe hulle net ná twee by die voordeur instap. Nicolene gee ’n lang gaap, maar Andrew het duidelik ander planne en dis met moeite dat sy hom oortuig om ook bed toe te gaan.
Toe sy uiteindelik op haar bed neerval, sluit sy dadelik haar oë en gee haar aan die slaapnewels oor … voordat die stem agterin haar kop weer hoorbaar kan word.
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.
