mense om eerder hulle MIV-status geheim te hou.
Die Israeliete het dieselfde gevoel oor mense wat ’n velsiekte gehad het. Hulle was bang dit is dalk melaatsheid, of dalk ’n tipe velkanker. Daarom is sulke mense uit die kamp verdryf. Hulle moes so ver hulle loop, roep: “Onrein, onrein!” om die ander mense te waarsku om weg te bly. Wat ’n ontsettende eensaamheid.
Die Here Jesus het ’n ander benadering tot sulke mense gehad. Hy was nie bang om hulle aan te raak nie (vgl Matt 8:3). Hy het melaatse mense genees (vgl Luk 17:12-14). Hy het saam met hulle gebly en geëet (vgl Mark 14:3). Miskien ken jy ook mense wat vereensaam is en ’n groot behoefte het aan iemand wat na hulle sal uitreik. Die Here wil dit deur jou doen. Is jy gewillig om Jesus se hande en voete te wees? Of voel jy self verstote?
GEBED: Gee my die liefde om uit te reik na verstote mense, Here.
Lees vanaand in Levitikus 13:40-46 hoe die gevaar van ’n bleskop ondersoek is.
Sondag 18 Januarie 2015 • Lees eers Psalm 25:1-11
Die regte pad
Maak my u wil bekend, Here, leer my u paaie (25:4).
GESELSVRAAG:
Wanneer laas het jy lekker verdwaal?
“Draai nou links regs,” beveel my kollega se iPhone terwyl ons na ons blyplek in Pretoria soek. Dit is nogal handig as jou selfoon deesdae ook ’n ingeboude pratende GPS het, maar wat help so ’n onverstaanbare opdrag? Gelukkig het ek ’n idee gehad waar die plek is en kon ek die foon se aanwysing ignoreer en reguit aanhou. Ons het darem by die regte plek uitgekom.
In vandag se psalm vra Dawid om leiding. Let op hoe baie hy praat van leiding en dwaling. Hy weet dat net die Here hom kan lei om die regte besluite te neem en die regte dinge te doen. Hy was gewillig om God se leiding te aanvaar en daarvolgens te lewe. Hy het geweet dat hy in sy jong dae ongehoorsaam was (vgl v 7). Maar die Here wil selfs vir sondaars die regte pad aanwys (vgl v 8). Die kenmerk van God se paaie is liefde en trou (vgl v 10).
Ons weet nie wat alles hierdie week met ons gaan gebeur nie. Maar die Here weet dit. Hy wil ons vandag in die erediens daarvoor voorberei, net soos Hy dit ook elke dag doen in ons stiltetyd. Let dus op watter boodskap die Here vir ons bedoel. Dalk is dit in ’n lied wat ons gaan sing, of in ’n gebed, of in die opmerking van ’n vriend, of dalk selfs iewers in die preek. Dit is soos ’n skattejag. Sal jy die regte leidrade kan sien en opvolg sodat jy hierdie week veilig kan wees?
GEBED: Lei my tog so dat ek dit sal verstaan, Hemelvader.
Lees vanaand Psalm 25:12-21 en let op die werkwoorde wat Dawid hier gebruik. Wat wil hy daardeur sê?
Maandag 19 Januarie 2015 • Lees eers Levitikus 13:47-59
Muwwe klere
As daar ’n kol skimmel is op ’n kledingstuk … (13:47).
GESELSVRAAG:
Wanneer moet ’n mens klere weggooi?
“Hoe lyk ’n mens se klere nadat jy dit 40 jaar lank in die woestyn gedra het?” Dit is nogal iets om oor te wonder, want daar is nie winkels om nuwe klere aan te skaf nie. Water is maar skaars in die woestyn, dus kan jy jou klere ook nie gereeld was nie. In die hitte is jou klere gou met sweet deurdrenk. En as jou klere begin stukkend raak, moet jy dit maar self lap. Die materiaal moet jy self weef en kleur en die leer self brei voordat dit geskik is om skoene of iets anders van te maak.
In die lang lys gesondheidsvoorskrifte wat vir die Israeliete in hierdie hoofstuk opgeteken is, kom ons nou by klere wat nie meer so vars lyk nie. Dit lyk regtig of daar iets op groei. Dis muf en gevlek. Hoe keer ’n mens dit? Is dit dalk iets wat jou vel kan aanval? Is dit veilig om te dra? Die priesters word maar weer ingeroep om raad te gee.
Vir ons is hierdie reëls nie meer van belang nie. As ons klere nie meer goed is nie, gooi ons dit eenvoudig weg en koop nuwes. Min van ons het nog die kundigheid om self materiaal te weef en klere te maak. Maar daar is wel ander dinge wat vir ons skade kan berokken. Dwelms en alkoholiese drank kan ons lewe verwoes. ’n Sedelose lewenstyl kan ons doodmaak. Tabak en ander stowwe kan kanker veroorsaak. Ook ons moet versigtig wees.
GEBED: Here, hou my rein sodat ek vir U kan lewe.
Lees vanaand in Levitikus 14:1-9 hoe iemand wat ’n velsiekte gehad het, weer na sy huis kon terugkeer.
Dinsdag 20 Januarie 2015 • Lees eers Levitikus 14:10-20
Dankie, Here!
Die priester wat die reiniging doen, moet dan die persoon wat gereinig word, saam met sy offergawes bring … in die teenwoordigheid van die Here (14:11).
GESELSVRAAG:
Hoe sê ons vir die Here dankie vir sy seën?
“Ondank is die wêreld se loon,” herinner die spreekwoord ons. As jy iemand help met die verwagting om ten minste ’n woord van dank te ontvang, word jy dikwels teleurgestel. Daarom moet ons liewer mense help omdat Jesus dit van ons verwag en nie om die eer van mense daardeur te verwerf nie.
In vandag se gedeelte leer ons hoe iemand wat van sy velsiekte genees is, weer vir die Here kan dankie sê. Hy moes na die tabernakel toe gaan om die Here te dank, en sekere dankoffers saamneem wat hy met die priester moes deel. Dit was ’n hele plegtigheid, sodat die volk daarna geweet het dat hierdie mens nie meer onrein is nie, en dat hulle vryelik met die persoon kon omgaan sonder die gevaar om aan te steek.
Ons almal het so baie dinge om vir die Here voor dankie te sê. Ons hoef nie te wag tot ons wonderbaarlik van ’n siekte genees is nie. Ons kan dankie sê vir ons gesondheid, ons werk, ons gesin, ons huis, dat ons kan sien en hoor, en duisende ander dinge. Maar ons wil dit nie net sê nie. Ons wil dit ook wys deur die dankoffers wat ons aan die Here gee. Hoe dankbaar is jy as jy kyk hoeveel van jou inkomste jy in die Here se werk belê?
GEBED: Dankie vir al u seëninge, Hemelvader.
Lees vanaand in Levitikus 14:21-32 hoe ’n arm persoon ook vir die Here kan dankie sê vir sy genesing.
Woensdag 21 Januarie 2015 • Lees eers Levitikus 14:33-47
Maak jou huis veilig
Julle gaan intrek in die land Kanaän wat Ek vir julle as besitting gee (14:34).
GESELSVRAAG:
Watter gevare kan julle huis bedreig?
“Baie van die geskiedkundige ou huise op die dorp is sonder behoorlike fondamente en van rou stene gebou. As daar dus water inkom, kan dit die mure onveilig maak. Die munisipaliteit kan jou verplig om jou huis plat te slaan en presies met dieselfde voorkoms oor te bou van beter materiaal as dit ouer as 60 jaar is,” verduidelik ’n bou-inspekteur. En dit het in baie gevalle gebeur. Dit is sleg as klammigheid in die mure optrek en alles muf begin ruik. So ook as die waterpype in die mure begin lek, of as die bedrading onveilig is.
Die Israeliete was nog op trek na die beloofde land, en almal het in tente gewoon. Hulle het egter verwag om die huise wat hulle in daardie land sou verower as hul eie te betrek. Hulle het nie geweet wat hulle sou kry nie. Hierdie laaste deel van die wetboek moes hulle dus help om ’n veilige huis vir hulle en hul gesin te verseker.
Ons
