Lees eers Levitikus 17:1-9
Bly getrou!
Die Israeliete mag nooit weer diere slag vir die veldgode en só aan die Here ontrou wees nie (17:7).
GESELSVRAAG:
Waarop vertrou mense, afgesien van die Here?
“Jy sien mos dis nie ’n witmenssiekte hierdie nie. Die dokter se medisyne het niks gehelp nie. Hierdie siekte kom van die voorvadergeeste. Jy moet hulle tevrede stel deur vir hulle offers te bring,” het ’n welmenende lidmaat aan evangelis Jafta verduidelik toe sy dogtertjie baie siek geword het. In die Xhosakultuur is dit niks vreemds dat Christene ook aan die voorvadergeeste offers bring nie. Dit gebeur selfs in sommige kerke.
Die Israeliete het in Egipte met baie godsdienste te doen gekry. Sommige het toe ook vir die plaaslike gode begin offer. Die teks praat van “veldgode”. In die oorspronklike taal is dit iets soos “bok-demone”, soos sommige vertalings dit weergee. Die volk word dus verbied om sommer op enige plek te offer. Alle offers mag net aan die Here wees. Hulle mag nie op iets anders vertrou nie (vgl v 7).
Vandag soek baie mense hulp by “Die sterre voorspel” of by bossiedokters. Toordokters het selfs spreekkamers in Kerkstraat in Pretoria. Ander maak staat op die geluksgodin wanneer hulle dobbel. Bygeloof maak dat sommige mens ’n knippie sout oor die skouer gooi of dat hulle nie onderdeur ’n leer wil loop nie. Gelukbringers om die nek of aan die arm moet ons veilig hou as ons reis. Dit is niks anders as afgodsdiens nie.
GEBED: Dankie dat U sterker is as enige afgode, Hemelvader.
Lees vanaand in Levitikus 17:10-16 oor die rol van bloed in die versoening van sondes, en waarom die volk dit nie mag eet nie.
Dinsdag 27 Januarie 2015 • Lees eers Levitikus 18:1-15
Bloedskande
Niemand van julle mag met ’n naby bloedverwant geslagsgemeenskap hê nie. Ek is die Here (18:6).
GESELSVRAAG:
Hoekom is verkragting so algemeen in ons land?
“Suid-Afrika is die verkragtingsmekka van die wêreld,” skryf iemand onlangs in die koerant. Luidens ’n berig op die internet word 82 000 vroue en kinders elke maand in ons land verkrag. En meestal deur iemand wat hulle goed ken: ’n pa, ’n oupa, ’n oom, ’n broer. Daar is iets radikaal verkeerd in ons land. Die letsels wat daardie kinders, vroue en selfs mans vir die res van hul lewe dra, getuig hoe duisende lewens verwoes word.
Die Here wil ons teen sulke gesinsgeweld beskerm. Vandaar die ernstige voorskrifte wat ons vandag gelees het. As ’n mens die Bybel verwerp, verloor jy daarmee ook die duidelike morele voorskrifte daarin. Later begin elkeen doen wat in hul eie oë goed is, en die uiteinde is verwoeste lewens.
’n Pa het in die hof getuig dat hy graag wou hê dat sy dogtertjie se eerste ervaring van seks in ’n liefdevolle omgewing moes wees. Dit is waarom hy haar verkrag het – uit liefde. Verskriklik. Dit lyk asof wellus in ons land oorgeneem het. “My boetie het gesê hy sal my van seks leer,” skryf ’n meisie aan wyle dr Murray Janson. “So nou oefen ons so drie maal per week. Is dit verkeerd?” Dit lyk asof die boek Levitikus nooit in hul huis gelees is nie. En in julle s’n?
GEBED: Here, bewaar ons en ons kinders van onsedelike dade.
Lees vanaand in Levitikus 18:16-30 van nog meer afstootlike gebruike van die heidene wat totaal verbode is.
Woensdag 28 Januarie 2105 • Lees eers Levitikus 19:1-14
Wees anders!
Praat met die hele gemeente Israel en sê vir hulle: Wees heilig, want Ek die Here julle God is heilig (19:2).
GESELSVRAAG:
Hoe leef Christene anders as ander mense?
“’n Opname is in die VSA gemaak om vas te stel wat die verskil in lewenstyl is tussen ‘weergebore’ Christene en die res van die bevolking. Daar is bevind dat daar feitlik geen verskil is nie, behalwe miskien dat Christene makliker skei,” lees ek op die internet. Hoe kan dit wees? Die Bybel sê dan duidelik ons moet heel anders as die ongelowiges wees.
Moses vat hier saam hoe die lewe van God se volk van die heidene rondom hulle se lewe moet verskil. Ons het respek vir die gesag wat oor ons gestel is (vgl v 3). Ons het nie afgode waarop ons vertrou nie (vgl v 4). Ons eer die Here in alles wat ons doen (vgl v 6-8). Ons gee om vir armes en vreemdelinge (vgl v 9-10). Ons is nie oneerlik nie (vgl v 11). Ons praat altyd die waarheid (vgl v 12). Ons buit nie swakkes en minderbevoorregtes uit nie (vgl v 13-14). Ons lewe dus heel anders as die ongelowiges.
Ons moet onthou dat die ongelowige wêreld bedreig voel deur mense wat reg lewe. Hulle verlekker hulle daarin as dit blyk dat Christene, veral kerkleiers, ook maar voete van klei het en ook vir die versoeking kan swig. Uit eie krag kan ons nie staande bly nie. Daarom het ons die krag van die inwonende Heilige Gees nodig om ons die oorwinning oor versoekings te gee.
GEBED: Here, bewaar my vandag van al die versoekings.
Lees vanaand in Levitikus 19:15-22 hoe die Here ons lewe steeds verander.
Donderdag 29 Januarie 2105 • Lees eers Levitikus 19:23-37
Eerbied
Uit eerbied vir jou God moet jy eerbied bewys aan oumense en hulle met respek behandel. Ek is die Here (19:32).
GESELSVRAAG:
Hoe sorg ons vir die oudste mense in ons familie?
“Dit lyk my ons kan eenvoudig nie wen nie. Toe ek jonk was, is die gryses onder ons met hoë agting bejeën. Mense het na hul wysheid geluister. Noudat ek self grys geword het, ontdek ek dat die jong sportsterre, modelle en filmsterre se opinies geag word,” kla ds Schalk een Sondagoggend. ’n Ma skryf: “Ek wonder of ons tieners besef dat hulle eendag net so dom sal wees as wat hul ouers vandag in hul oë is.”
In die Bybelse tye was daar geen pensioenskemas en aftree-oorde nie. Wanneer ’n mens nie meer kon werk nie, moes jou nageslag vir jou sorg. Sonder kinders sou jy van honger doodgaan. Daarom was dit belangrik om soveel kinders moontlik te hê, soos baie mense in Afrika vandag nog glo. Maar met die staatspensioene wat deesdae betaal word, word oumense uitgebuit. Hulle ly terwyl hul nageslag op die pensioen teer. Dit is net mooi die teenoorgestelde van wat die Here in vandag se gedeelte beveel.
Omdat die Here Here is, moet ons omsien na hulle wat nie meer vir hulle-self kan sorg nie. Baie bejaardes word in ’n tehuis geplaas en nooit meer besoek nie. Al is iemand al kort van gedagte, het elkeen liefde nodig. Is jy gewillig om God se liefde na die bejaardes in jou omgewing uit te dra?
GEBED: Here, gebruik my om iemand vandag te seën.
Lees vanaand in Levitikus 20:1-9 wat gebeur met mense wat hul kinders misbruik of by mediums of waarsêers hulp gaan soek.
Vrydag 30 Januarie 2105 • Lees eers Levitikus 20:10-21
Doodsake
Twee mans wat homoseksueel verkeer, doen ’n afskuwelike sonde. Hulle moet doodgemaak word. Hulle verdien die dood (20:13).
GESELSVRAAG:
Hoekom
