Moses (en die Here) sou darem sterk teenstand kry as hulle dit vandag sou waag om so ’n sterk standpunt hieroor in te neem,” het jy seker gedink toe jy vandag se Skriflesing gelees het. Dit is beslis nie polities korrek nie. Jy kan voor die hof gedaag en van misdade aangekla word. Ons praat nie oor hierdie dinge nie, behalwe in fluisterstemme agter ons hand. Vandag se mense weet mos altyd beter as die Here.
In vandag se gedeelte word helder en duidelik oor seksuele sondes gepraat. Hoewel hierdie soort lewenswyse vandag in die media as doodnormaal geteken word, is dit hier duidelik dat God dit nie wil hê nie. God wil die huwelik heilig as ’n veilige plek waar kinders tot sy eer gevorm word. Ontrou in die huwelik lei tot gebroke huwelike. En die kinders ly daaronder. So baie van ons wens dat ons daardie onbesonne daad kon uitvee.
God maak hiervoor ook voorsiening sedert Jesus gekom het. “Moenie julleself mislei nie: geen onsedelikes of … egbrekers of mense wat homoseksualiteit beoefen … sal deel kry aan die koninkryk van God nie” (1 Kor 6:9-10). Sommige Korintiërs het dit self gedoen, maar is deur Christus en die Heilige Gees daarvan bevry en vrygespreek (vgl 1 Kor 6:11). God se liefde is oneindig.
GEBED: Here, help my in liefde uitreik na elkeen in gevaar.
Lees vanaand in Levitikus 20:22-27 die verdere samevatting van die nuwe lewenstyl van mense in die beloofde land.
Saterdag 31 Januarie 2105 • Lees eers Levitikus 21:1-8
Stel die voorbeeld
Hulle moet aan hulle God alleen gewy wees en mag nie sy Naam ontheilig nie (21:6).
GESELSVRAAG:
Moet ’n predikant anders as die lidmate lewe?
“Vandag lyk jy na ’n regte predikant, Dominee,” was ’n suster se kommentaar toe die dominee sy toga aantrek voordat hy die sakramente bedien. Waar kom dit vandaan dat predikante swart pakke en wit dasse moet dra? Of in die ou dae manelpakke en beffies? En waar kom die swart togas vandaan? Beslis nie uit die Bybel nie. Dit was ’n teken van geleerdheid in die Middeleeue wat ons geërf het. Dit was ’n statussimbool.
Die Here wou Moses leer hoe om die heiligheid van die amp te bevestig. Nie soseer deur snaakse klere te dra nie, maar deur ’n heilige lewenswandel. Die priester moes die voorbeeld stel vir die gemeente. Mense moes sommer sien dat hierdie mens ten volle aan die Here gewy is.
Vandag vind ons dit vreemd. Sedert Christus se koms is elke gelowige ’n priester. Ons kan nou self met God kommunikeer. Elke vader is die priester van sy huisgesin. In die Midde-Ooste deel elke gesin se pa die nagmaal aan die gesinslede uit en stel die nagmaal vir hulle in. Maar omdat ons nou ’n volk van priesters is (vgl 1 Pet 2:9), moet ons lewe soos mense wat ten volle aan God gewy is. Ons kinders leer deur ons voorbeeld, nie deur ons woorde nie.
GEBED: Here, help ons om heilig te lewe, tot u eer.
Lees vanaand in Levitikus 21:9-24 hoe mense gekeur is om in die tabernakel te dien.
Februarie
Sondag 1 Februarie 2105 • Lees eers Psalm 27:1-6
Waar voel jy tuis?
Net een ding het ek van die Here gevra en dit sal ek najaag: dat ek my hele lewe lank in sy huis mag woon om sy goedheid te belewe en daaroor na te dink in sy tempel (27:4).
GESELSVRAAG:
Wens jy die eredienste kon langer duur? Verduidelik.
“Ons is na die Pinkstersaamtrek van ’n aantal Afrika-Onafhanklike Kerke (AOK) genooi. Dit sou tienuur begin, maar eintlik het ons eers elfuur begin. Teen vieruur die middag moes ons verskoning maak – die gemeente het toe nog nie geëet nie, maar daar was nog etlike kore en predikers wat vir hul beurt gewag het. Toe ons vra hoekom die dienste so lank duur, was die antwoord: ‘Maar dis mos lekker hier. Hoekom moet ons haastig wees?’” Vir die meeste van ons is so ’n lang diens ’n marteling. Hoekom? Waar lê die fout? ’n Leier uit Afrika het verduidelik: “Julle het die horlosies. Ons het die tyd.”
Dit is duidelik dat Dawid se kultuur baie nader aan dié van Afrika was as aan dié van die Weste. Dit was vir hom lekker om die Here te aanbid. Hy kon ure in die tempel deurbring saam met die Here, al was hy die koning van Israel.
“Die ouderling het vir my gesê ek kan oor enigiets preek – net nie oor ’n uur nie,” vertel ’n predikant met ’n vonkel in die oog. Paulus sou nie in daardie gemeente welkom wees nie, want hy het by geleentheid deur die nag gepreek (vgl Hand 20:7-11). Hoekom maak ons tyd vir alles behalwe die Here?
GEBED: Here, dit is vandag vir my lekker om tyd saam met U deur te bring. Ontmoet my en seën my, sodat ek ander kan seën.
Lees vanaand Psalm 27:7-14 en onderstreep elke vers wat op jou van toepassing is.
Maandag 2 Februarie 2105 • Lees eers Levitikus 22:1-9
Lewe versigtig
Die priesters moet my bevel gehoorsaam en nie sondig nie (22:9).
GESELSVRAAG:
Wat verwag ons meer van ’n dominee as van lidmate?
“’n Trein loop nie verder as die lokomotief wat hom trek nie.” Baie mense verwag van hul leraar dat hy of sy heiliger as die res van die gemeente moet wees. Dít lei daartoe dat sommige kerkleiers – of hul kinders – daarteen in opstand kom en met opset anders optree as wat van hulle verwag word. Geen mens hou daarvan dat iets aan jou opgedring word nie. (Die mens bly maar ’n opstandige wese.)
Vandag se Skrifgedeelte herinner ons daaraan dat dit nie gaan oor wat mense van jou verwag nie, maar oor wat God van jou verwag. Die wette wat ons vandag saam gelees het, geld nie meer sedert Jesus die finale hoëpriester geword het nie. Tog leer dit ons dat God verwag dat kerkleiers die regte voorbeeld moet stel. Mense moet weet dat ons aan God gewy is. Dit maak dat ons anders optree. Ons besef dat die gesegde “Elke mens moet sy sondetjie hê” nie waar is nie. God verwag meer van sy kinders. Elke sondetjie het die bloed van Christus gekos om te versoen. Sonde is dus nie iets om mee te speel nie.
Min dinge gee aan ongelowiges soveel plesier as om te lees of te hoor van kerkleiers wat in sonde geval het. Sulke stories verkoop die Sondagkoerante. Maar vir Christus en elke ware kind van God bring dit hartseer. God se eer is op die spel. Kom ons soek om God vandag te gehoorsaam.
GEBED: Here, help my vandag so lewe dat U daardeur vereer word.
Lees vanaand in Levitikus 22:10-16 wie toegelaat is om van die gewyde gawes te eet. Sê dit vir jou iets oor die nagmaal?
Dinsdag 3 Februarie 2105 • Lees eers Levitikus 22:17-33
Wie is jou God?
Ek het julle uit Egipte gebring sodat Ek julle God kan wees. Ek is die Here (22:33).
GESELSVRAAG:
Wat maak ons God anders as ander gode?
“Wat op aarde maak ek hier?” het op die hempies gestaan wat ons gemeente laat druk het vir sy eerste 40-dae-studie. Dalk is dit ’n vraag wat ook al by jou opgekom het. Waarvoor het God my gemaak? Waarvoor het Hy my gered? Is dit bloot toevallig dat ek vandag in Suid-Afrika woon? Het Hy dalk ’n
