stecken kann, zu vielseitig war sein Schaffen.
Es ist tröstlich, dass ein so begnadeter Künstler seine Begabung niederschrieb – durch diesen Sammelband weilt er weiter in unserer Mitte …
Oskar (Ossi) Huber
Orthographie
Da Brucknputzpepe, a anfacher Bursch,
der sagt zu sein Freund, dem Schlapfnschupfschursch:
„Du, Schurschl, paß auf! I hab a Idee!
In da Freizeit, da langweiln mir bade uns eh –
mir bestelln uns a Gwehr, mir wern nit lang wartn,
und schiaßn dann Scheibm bei uns zhaus im Gartn!“
„A prima Idee!“ sagt da Schursch zu sein Freund –
worauf sie schon bade beim Briafschreibn seind.
„Wir bestellen hiermit zum Sport ein Gewehr …“
Da Pepe halt inne und denkt hin und her.
„Gewehr …? Du, schreibt ma´s, du waßt es ja eh –
mit an reinen E oder mit Umlaut-Ä?“
Da Schursch sagt: „Mit Umlaut! Hurch nur: Gewärr!“
Da Pepe sinniert und übalegt sich´s ganz schwer,
dann sagt er: „Das Umlaut, i laß es doch bleibm!
I man, i wer´s liaba mit reinem E schreibm!“
Da Schursch aber kämpft (fast wia mit´n Messer):
„Na! Umlaut-Ä schreib; werst sehgn, das is besser!“
Und so streitn de zwa wegn dem Wörtlan „Gewehr“
zwa volle Stundn lang hin und her.
Drauf mant da Seppl, nach de zwa Stundn:
„I hab hiatz a bessare Lösung gfunden!
Anstatt dem, Gewehr’, da schreib i, Flinte’!“
Schon taucht er sei Feder hinein in die Tinte
und sagt: „Waßt, ,Flinte’, das waß i genau,
schreibt ma garantiert mit an Vogl-Vau!“
Länge und Höhe
Da Brucknputzpepe lahnt a Later zan Haus
und packt aus an Packtlan a Maßbandle aus.
Ganz untn bei der Later, da heftet der Mann
den Maßbandlanfang mit an Reißnagl an.
Dann steigt er von Sprossn zu Sprossn empor –
an Reißnagl, an zweitn, holt er oben hervor
und heftet das Maßband aufn Laterspitz an …
Da Schlapfnschupfschurschl kummt hiatz grad heran
und sagt dann zum Pepe: „Was machst denn da, Sepp?“ –
„Die Later miß i ab, das siehgst doch, du Tepp!“
„Klar siehg i´s! Aber, waßt du, du machst das extrem!
Leg die Later aufn Bodn, dann geht´s Messn bequem!“
Da Brucknputzpepe denkt kurz amol nach,
dann sagt er zum Schurschl: „Geh, mach mi nit schwach!
Leg i die Later aufn Bodn, hab i di Länge wohl gwiß,
aber i möcht ja wissen, wia hoch daß sie is!“
Kane Leut
Da Brucknputzpepe war a Wal bei der Post
und hat durt die Freudn und Leidn auskost …
Auf an Sunntag, da ladet er urntlich und fein
auf da Bahnpost untn Paktlan ein.
Er schwitzt und rennt als wia a Narr,
und die Paktlan wern halt gar nit gar.
Bei da Tür vom Postamt, im Parterr,
steht ein Adjunkt – ein hoacher Herr –,
der schaugt, ob wohl da Pepe fein
die Packtlan urntlich ladet ein.
Und drobn beim Fenster im erstn Stock,
da steht im neuen blauen Rock
da Kontrollor – der legt drauf Wert,
daß der Adjunkt, so wia sich´s ghört,
genau schaugt, ob da Pepe fein
die Packtlan urntlich ladet ein.
Im zweitn Stock beim Fenster stehnd
a Inspekta und a Revident –
de übazeugnt sich mit die Augn,
daß ja der Kontrollor tuat schaugn,
ob der Adjunkt drauf streng legt Wert,
daß auch, so wia si sich´s halt ghört,
am Bahnsteig durt da Pepe fein
die Packtlan urntlich ladet ein.
Da Pepe geht dawal, uh mein!
vur lauter Arbeit völlig ein –
er schwitzt und rennt als wia a Wiesl,
aber helfen tuat ihm niambt a bißl …
Im Gegenteil: Der Herr Direkta
schielt auße, ob wohl der Inspekta
und ebenso der Revident
mit Eifer auf der Lauer send,
daß auch der Kontrollor gibt acht,
ob der Adjunkt darüber wacht,
daß auch der Pepe brav und fein
die Packtlan urntlich ladet ein …
Da Pepe setzt sein Ehrgeiz dran
und eilt und schuftet, was er kann!
Hiatz
