op. Hy reken die rede daarvoor is dat die mans nie tot bekering mag kom nie, want hulle is die kontakpersone met die voorvadergeeste. Die geesteswêreld is ’n groot werklikheid in Afrika. Wanneer jou voorvadergeeste voel jy skeep hulle af, kan daar groot rampe oor jou kom, glo hulle.
In die Bybelse tye was dinge anders. Die mans was die kontakpersone met die Here. Hulle was elkeen die priester van sy huis; daarom moes hulle in al die godsdienstige handelinge leiding neem. Alle mans moes drie keer elke jaar vir ’n godsdienstige fees bymekaarkom. Net soos die Mighty Men wat in hul tienduisende saamtrek om in primitiewe omstandighede die Here opnuut te leer ken, so was die mans drie keer elke jaar herinner aan hul verpligtinge teenoor hul gesinne en hul God.
“Sakemanne kom nie kerk toe nie. Hulle stuur net hul vroue en kinders daarheen. Hulle is self te besig om geld te maak. Hulle het nie tyd vir die Here nie,” merk ’n Christen-sakeman teenoor my op. Dit is darem baie jammer. Wat leer hulle aan hul kinders deur hul voorbeeld? Dat geld belangriker is as die ewigheid? Kom ons bid dat ons mans se prioriteite regkom.
GEBED:
Here, lei ons mans sodat ons die regte leiding kan gee.
Lees vanaand in Eksodus 23:20-33 die beloftes van voorspoed en seën as die Israeliete net gehoorsaam sou wees.
Sondag 2 Februarie 2014 Lees eers Psalm 124:1-8
Die Here help
Ons hulp kom van die Here wat hemel en aarde gemaak het. – Ps 124:8
GESELSVRAAG:
Waar voel jy veilig?
“It’s a jungle out there!” het die hoof van die polisie van ’n gewilde TV-sepie altyd sy personeel herinner. Hoewel hulle in ’n groot stad gewerk het, het dit nie die gevare minder gemaak nie. Hulle kon net sowel iewers in ’n gevaarlike oerwoud gewerk het. Elke koerant en nuusberig herinner ons daaraan dat dit net so waar van ons eie land is, maak nie saak waar jy woon nie. Ons is daagliks in lewensgevaar, of ons nou in die stad, op die platteland of op ’n plaas woon.
Die pelgrims wat op pad na of van Jerusalem hierdie lied gesing het, kon ook getuig dat die Here hulle op hul pad bewaar het. Daar was baie gevare op die pad. Hulle is deur rowers aangeval, maar die Here het hulle teen die kwaaddoeners beskerm; daarom sing hulle hierdie lofpsalm. Hulle het geweet waar hul hulp vandaan gekom het en ook in die toekoms sou kom.
Waar is die veiligste plek om vandag te wees? Statisties is dit seker in die kerk. Vra maar die versekeringsmaatskappye hoeveel mense in die kerk sterf! Die gevaarlikste plek om te wees, is in die bed – verreweg die meeste mense sterf daar! Maar die grootste gevaar van almal is nie die dood van ons liggaam nie – dit is om ons ewige bestemming mis te loop. Ons moet vandag seker maak dat ons gereed is vir die finale reis na die ewigheid. Dalk sal vandag se erediens jou help.
GEBED:
Here, net U kan ons veilig na die ewigheid neem.
Lees vanaand in Psalm 125:1-5 waarom dit belangrik is om volledig op die Here te vertrou.
Maandag 3 Februarie 2014 Lees eers Eksodus 24:1-8
Beloftes, beloftes
Hulle het soos een man gesê: “Ons sal alles doen wat die Here beveel het.” – Eks 24:3
GESELSVRAAG:
Watter beloftes het ons al aan die Here gemaak?
“Belowe jy … ?” begin die gelofte wat ons elkeen maak as ons belydenis van geloof aflê, of in die huwelik tree, of ons kinders bring om gedoop te word. Daar is ook so baie ander geleenthede waar ons dinge aan die Here belowe. Ongelukkig vergeet ons so gou presies wat ons belowe het. Die meeste van die katkisante makeer in die erediens die Sondag ná hul geloofsbelydenis. ’n Baie groot persentasie van huwelike beland op die rotse weens die ontrou van een of albei van die bruidspaar. Ons belowe om ons kinders vir die Here groot te maak, maar vergeet om elke dag huisgodsdiens te hou en om elke Sondag ons kinders kerk toe te lei. Ons vergeet dat ons woorde en ons voorbeeld deur die week so maklik ons kinders van die Here af weglei.
Die Here het vir Moses, Aäron en sy twee seuns en sewentig ander leiers van Israel genooi om Hom op die berg te ontmoet. Hy wou ’n verbond met hulle sluit om te verseker dat hulle sy gebooie sal gehoorsaam. Hulle het dadelik belowe om dit te doen. Beloftes is maklik. Ongelukkig het hulle so gou vergeet wat hulle belowe het, soos ons nog sal sien.
Wat wil jy vandag vir die Here belowe? Bedoel jy dit? Sal jy dit werklik doen?
GEBED:
Here, help my om my beloftes ten volle te hou.
Lees vanaand in Eksodus 24:9-18 hoe die groep verteenwoordigers iets van God se majesteit ervaar het.
Dinsdag 4 Februarie 2014 Lees eers Eksodus 25:1-22
Plek van ontmoeting
Dáár sal Ek jou ontmoet […] Al my bevele vir die Israeliete sal Ek jou van daar af gee. – Eks 25:22
GESELSVRAAG:
Waar is ons plek van ontmoeting met die Here?
“Dominee, ek het probleme gehad met dwalende gedagtes as ek probeer bid. Toe dink ek daaraan dat God mos alomteenwoordig is. Dan is Hy mos op hierdie stoel ook,” en hy wys na die stoel langs sy bed. “Ek praat dus elke dag met Hom hier. Dit is my plek van ontmoeting.” ’n Paar weke later is oom Petrus oorlede. Sy dogter vertel dat hulle hom gekry het waar hy met sy een arm na die stoel toe uitgestrek gelê het asof hy iemand groet.
Moses het die Here op die berg ontmoet, en veertig dae lank het hy presies gehoor hoe die tabernakel moes lyk. Dit sou die plek van ontmoeting wees wat saam met die Israeliete sou trek. Op elke plek waar hulle gekom het, sou die Here hulle lei deur in die tabernakel met Moses te praat. Die Here het met Moses gepraat soos ’n vriend met sy vriend praat. Wat ’n voorreg.
“Ma se groen stoel,” het Evelyn Christensen se kinders die stoel genoem waarby sy elke dag gekniel het om te bid. Deur die jare het die stoel verskillende kleurskakerings ondergaan, maar dit het maar “die groen stoel” vir haar kinders gebly. Dit was haar plek van ontmoeting met die Here. Het jy ook so ’n spesiale plek van ontmoeting? Dit word vertel dat John Wesley se ma met agtien kinders sommer langs die kombuistafel haar voorskoot oor haar kop getrek het om te bid!
GEBED:
Here, ek het ook ’n plek van ontmoeting met U nodig.
Lees vanaand in Eksodus 25:23-40 hoe Moses gehoor het hoe die meubels van die tabernakel moes lyk.
Woensdag 5 Februarie 2014 Lees eers Eksodus 26:1-13
Draagbare tempel
Jy moet ’n tabernakel maak […] – Eks 26:1
GESELSVRAAG:
Hoe kan ons die kerk vandag meer beweeglik maak?
“Die probleem met vandag se gelowiges is hulle dink die kerk is iets om na heen te gaan in plaas van iets om te wees,” lees ek op die internet. Dit is nogal iets om
