en depressief oor alles en almal in die lewe.
Verslawing is ’n siekte wat as obsessiewe en kompulsiewe gedragspatrone manifesteer. Altesaam 95 % van alle verslaafdes ly dikwels aan ’n dubbele diagnose: depressie, bipolêre versteurings, eetversteurings, seksverslawing, selfverminking en persoonlikheidsversteurings, en so meer. Dit kan óf die oorsaak óf ’n gevolg van die verslawing wees. Dis baie gekompliseerd en daar is nie net een antwoord op die probleem nie. Die siekte is fisiek, geestelik, emosioneel en psigies. Elke probleem moet stap vir stap hanteer word sodat genesing op al hierdie vlakke kan plaasvind.
Werklike genesing is ’n kombinasie van talle prosesse en aksies waarvoor die verslaafde verantwoordelik is. Dit sal proaktief vir die res van jou lewe toegepas moet word. Dit gaan vereis dat jy ou oortuigings sal moet weggooi om ’n radikaal nuwe fondament te gooi waarop jy vir die res van jou lewe sal moet bou. Dis ’n totale paradigmaskuif wat moet plaasvind; ’n hartsverandering, ’n kopskuif, ’n algehele oorgawe aan God.
Jy is nie alleen in hierdie proses nie. Daar is verskillende groepe met verskillende programme wat jou tydens rehabilitasie kan ondersteun. My eerste Narkotika Anoniem-byeenkoms was in ’n kerksaaltjie in Kalkbaai. Almal het hulself as verslaafdes voorgestel en met die groep hul hoop en ervarings gedeel.
Hulle het erken dat ’n lewe wat deur drank en dwelms beheer word ’n verskriklike lewe is, en dat hul lewe onleefbaar geword het. Hulle kon ook getuig hoe die lewe vir hulle ten goede verander het. Deur die God van liefde en omgee is hulle gered, en hul pyn en vrees het verander in ’n getuienis van oorwinning.
Eers het alles vir my soos ’n klomp nonsens geklink. Dit was tot ek een Dinsdagaand ’n man hoor praat het – dié man se storie het presies soos myne geklink. Sy verhaal het my tot stilstand geruk; dit was die eerste keer dat ek myself met iemand kon vereenselwig. Ek was nie die enigste een wat met hierdie soort angs, pyn, probleme, ’n disfunksionele gesin en eensaamheid geworstel het nie. Ek het besef ek is nie alleen nie en dat daar vir my ook dalk ’n klein bietjie hoop is. Daardie dag het iets binne-in my verander.
Die Twaalf Stappe tot herstel help jou om te verander, maar dit help jou ook om anders te dink. Dit is ’n proses wat sagkens die lae van ontkenning en valse persepsies wat ons vir soveel jare gekoester het, verwyder. Stelsematig vind ons uit wie ons werklik is, wie God is en wat ons doel op aarde is.
Jy kán volle bevryding ervaar en ná rehabilitasie ’n vol lewe lei. Vir ’n verslaafde of alkoholis klink so iets totaal onmoontlik. Ek het ook so gedink. Tog bestaan dit en is dit ’n werklikheid vir derduisende mense wat danksy die Twaalf Stappe wel genesing gevind het. As jy werklik ten volle genees wil word, moet jy weet:
•Om jou drinkery, dwelmgebruik of kompulsiewe gedrag stop te sit, is slegs die begin van ’n lewenslange transformasie. Jy sal waarskynlik benewens na ’n primêre binnepasiënt-rehabilitasiesentrum ook na ’n langtermyn- halfway house vir sekondêre behandeling moet gaan. Daar is al oor en oor bewys dat langtermynbehandeling van drie maande of meer doeltreffender is as korttermynbehandeling van drie tot ses weke lank. ’n Lys van goeie rehabilitasiesentrums word verskaf by www.hopeinaction.co.za.
•Gemengde gevoelens en onsekerheid oor die rehabilitasie sal moontlik tot ’n terugval lei. Verbind jou daartoe om alles in te sit.
•Jy moet die proses jou eie maak en aktief betrokke wees daarby. Wees eerlik en nederig, en sluit by ondersteuningsgroepe soos Narkotika Anoniem of Alkoholiste Anoniem aan. Die tye wanneer vergaderings plaasvind, word op die onderskeie webwerwe verskaf.
•Jy moet bereid wees om, indien nodig, weekliks met ’n terapeut of ’n herstelafrigter (coach) byeen te kom.
Daar is absoluut ’n plek vir chroniese medikasie in die proses van herstel en dit kan ook oorweeg word. Was dit nie vir medikasie nie, was ek sekerlik nou al dood. As jy nie jou tweewielfietsie kan ry nie, is ’n derde wieletjie nodig totdat jy weer kans sien om met twee wieletjies te ry. Medikasie sal nooit heeltemal ’n probleem kan wegvat nie, maar dit help om jou perspektief te gee oor jou uitdagings.
Daar is nog baie ander maniere wat jou op jou pad van herstel kan help. Oefening, terapeutiese behandeling, Godgesentreerde aktiwiteite, die korrekte dieet, verhoudinge bou, diens aan die gemeenskap asook om jouself te omring met ’n positiewe, opbouende omgewing en mense speel alles ’n sleutelrol in jou herstel.
Die soeke na herstel gaan jou dwing om met kritiese oë na jouself te kyk – dit gaan beslis nie ’n aangename proses wees nie, maar byt vas. Ek glo dat elke siel in die wêreld dit verdien om vry te wees, om die waarheid te ken, om bemagtig te word en om beter te wees as wat die wêreld van jou verwag.
Die lewe is moeilik, ek weet. Jy word elke dag met uitdagings gekonfronteer: stres by die werk, verhoudinge, die baas, familieprobleme, geweld en armoede. Mense sukkel sonder dat hulle daarvoor gevra het of dit verdien. Kom ek deel my persoonlike oplossing daarvoor met jou: Dit is hoe die lewe is – aanvaar dit. Dit is nie ons werk om God se doen en late uit te redeneer nie. Dit is wat dit is op die oomblik. As jy dink die lewe moet regverdig wees teenoor jou omdat jy regverdig is teenoor die lewe, is dit so goed jy sê die leeu moet jou nie eet nie, want jy eet nie die leeu nie. Jy het wat jy nou het, en vir eers is dit genoeg. Jy is waar jy is met ’n rede en dis in liefde vir jou beplan. Jy sal agterkom hoekom.
Russell Baker het die volgende gesê: “There is a hunger in us … for assurance that our lives have not been merely successful, but valuable – that we have accomplished something grander than just another well-heeled (well-off), loudly publicised journey from the diaper to the shroud. In short, that our lives have been consequential.”
Vandag is ek meer geseënd as ooit: Waar ek eens in sak en as was, het ek vandag ’n ryk en vol lewe. Jou lewe kan ook verander.
VERANDERING
Indien jy nie ernstig op soek is na herstel nie, sal jy dit nie kry nie. Jy sal ook nooit ware geluk of langdurige vrede vind indien jy nie alles in jou vermoë doen om skoon te bly en jou ten volle aan God wy nie. Maar om iemand te sien herstel en God se handewerk deur die herstelproses te ervaar, is onmeetbaar en die waarde daarvan onskatbaar.
Verslaafdes se grootste probleem is dat hulle alles dadelik wil hê en dat alles moet wees soos hulle wil hê dit moet wees. Wanneer jy aan verslawende gedrag ly, is jy obsessief, kompulsief en manipulerend. Jy wil altyd alles op die maklike en vinnige manier gedoen hê. Glo my, ek weet. Ons floreer op onmiddellike tevredenheid en as ons dit nie dadelik kan kry nie, gee ons maklik op. God is nie ’n towenaar of ’n feetjie nie en die lewe is nie ’n fliek nie. Verandering is nie ’n gebeurtenis nie, dis ’n proses. Min mense is werklik bereid om op hierdie reis van verandering te volhard.
Hoekom is hierdie reis so uitdagend? Dit verg ’n radikale oorgawe en opoffering. Om uit jou gemaksone te klim is ongelooflik moeilik. Om jou gewoontes en gedrag te laat vaar is nie maklik nie. Jy hou aan dié dinge vas omdat dit eintlik vir jou lekker is. Dit vervul in van jou basiese behoeftes. Daarom is dit so moeilik om dit prys te gee. Selfs wanneer jy tot die besef kom dat jou gedrag en gewoontes nie meer goed is vir jou nie …
Hierdie waarheid is moeilik om te aanvaar. Dis nie maklik om te aanvaar dat jou eie gedrag jou stelselmatig verwoes nie. Dikwels is dit dan makliker én gemakliker om eerder met die gedrag voort te gaan as om te verander, want verandering gaan beteken dat jy iets sal moet opoffer en prysgee.
Rabbi Abraham J Twerski verwoord dit soos volg: “When people who are addicted to alcohol or drugs deny their addiction, it is often because realisation of the truth would necessitate change; namely, to give up the use of their chemical, and this would cause them discomfort. Similarly, when people refuse to acknowledge the truth of the sovereignty of God, it is because such realisations
