invloed op ander het.
Wat is die geluksvlak in die wêreld en Suid-Afrika?
Waar dink jy lê Suid Afrika in vergelyking met ander lande op die VN se verslag van 2013 oor geluk in verskillende lande? Daar was 156 lande wat gemeld word.36 Wat is jou raaiskoot?
Hier is ’n tabel met ’n aanduiding van enkele lande:
| 1 Denemarke | 17 VSA |
| 2 Noorweë | 18 Brittanje |
| 3 Switserland | 82 Nigerië |
| 4 Nederland | 86 Ghana |
| 5 Swede | 96 Suid-Afrika |
| 6 Kanada | 152 Rwanda |
| 10 Australië | 156 Togo |
Wat kommerwekkend is, is dat Suid Afrika se prestasiepunt sedert die vorige verslag van 2005-2007 met 0,182 gedaal het.
In Suid-Afrikaanse navorsing (18 217 deelnemers) wat deur dr Nicola Taylor en Christine Yiannakis van JvR Psychometrics in 2007 saamgestel is, het die volgende interessanthede na vore gekom:37
•Daar was geen verskil in die geluk van mans en dames nie.
•Ouer mense was gelukkiger as jongeres.
•Wanneer die telling van geluk laer was, was die vlak van emosionele intelligensie ook laag.
•Lae telling van geluk was ’n aanduiding dat die persoon tekens van depressie getoon het, hom sosiaal onttrek het, ’n algemene ontevredenheid met die lewe ervaar het en bekommerd oor die toekoms was.
Gelukkigheid is ’n reis
Baie mense dink dat jy ’n punt bereik waar jy nou gelukkig is. Nee! Dit is ver van die waarheid. Dit gaan daaroor om gelukkiger te word en dit is ’n proses wat aanhou. Jy moet gedurig daaraan werk. Om gelukkig te wees is dus ’n lewenslange strewe, ’n lewenslange reis. Dit gaan oor “doing and not having”.38 Dit is soos bergklim. Die bereiking van die top is die kortstondige oomblik van euforie, maar die voorbereiding – stap, tree vir tree; die slukkies water, tree vir tree; die uitsig, tree vir tree – dít is wat dit die moeite werd maak. Dieselfde met geluk. Dit is om daagliks nuwe tegnieke, vaardighede of aktiwiteite op jou pad van geluk en lewensvreugde te toets. Elke oomblik, tree vir tree.
Gemoedstoestand en jou gedrag
Al daaraan gedink dat jou gemoedstoestand hierdie reis van tree tot tree beïnvloed? Al ooit daaraan gedink hoe ons gemoedstoestand op ’n onbewustelike manier ons gedrag beïnvloed? Kom ons kyk na ’n paar interessanthede uit navorsing.
Dit is amper vreesaanjaend as ’n mens na die volgende navorsing kyk.39 Alice Isen en haar kollegas het na die invloed van goeie gemoedstoestande gekyk. Hulle het geld in ’n openbare telefoon se gleufie gesit, waar jy gewoonlik jou kleingeld terugkry. Die mense wat oproepe gemaak het en hierdie ou gelukkie getref het om ’n ekstra geldjie te kry, was baie meer gereed om vreemdelinge wat met iets gesukkel het, te help. Mense wat by die telefone verbygeloop het (lede van die navorsingspan), het papiere laat val en hierdie “geluksvoëls” wat so pas ’n paar sente gekry het was maar te gewillig om met die optel van papiere te help. In ander navorsing het pasiënte vir hul dokters ’n pakkie met lekkers en sjokolade saamgeneem en die bevindings in hierdie studie was dat daardie dokters se diagnoses beter was: hulle het vinniger daartoe gekom en was aanpasbaarder in hul diagnose. Wrintiewaar! Vat volgende keer ’n paar sakke sjokolade vir jou dokter as jy ’n goeie diagnose wil hê. Hulle is ook maar mens, nè? Hou van ’n ou tjokkie!
Die koffie-studie is ’n ander navorsingsprojek wat wys hoe ons gemoedstoestand daagliks ons oordeel beïnvloed.40 John Bargh, professor in sielkunde aan die Yale-Universiteit, het baie van sy tyd gewy aan die studie oor hoe ’n mens se emosie jou gedrag beïnvloed. In hierdie studie het hy en sy kollegas ondersoek hoe ’n gewone koppie koffie ons onbewustelik kan beïnvloed of ons van iemand gaan hou of nie.
Die eksperiment is soos volg opgestel: Studente op pad na ’n laboratorium het verby ’n “laboratoriumassistent” geloop wat papiere en dokumente wat in wanorde was, met een hand probeer orden. In die ander hand was ’n koppie warm of, ander kere, koue koffie. Die student is gevra om net gou te help om die koppie koffie vas te hou terwyl die assistent die situasie uitstryk. Nou luister hierna: Die studente moes daarna ’n persoon evalueer. Diegene wat die koue koffie vasgehou het, het meestal die ander persoon as koud, minder sosiaal en selfsugtig beskou. Diegene wat die warm koffie vasgehou het, se siening was heeltemal die teenoorgestelde.
Die navorsing het bewys dat ons onbewuste ons altyd beïnvloed. Op grond daarvan neem ons rasionele maar ook dikwels irrasionele besluite wat ons gedrag en gedagtes beïnvloed. Die les wat ons hieruit leer, is moenie jou dag met ’n koppie koue koffie begin nie. Nee, ek oordryf nou maar ’n bietjie, maar dit is gewis ’n bewys van hoe ’n onbewustelike ongelukkigheid ons gedagtes en gedrag beïnvloed.
Gedagtes, gemoedstoestand en enigiets is moontlik
Dit is so ironies hoe die sielkunde dinge wetenskaplik bewys wat die Bybel lank reeds gesê het. Dink aan hierdie woorde soos jy verder lees in hierdie boek. Jou gedagtes beïnvloed jou lewe en kan jou gesondheid verander – dis Bybels! Kyk wat is in die Bybel reeds in Fil 4:8 gesê: “Verder, broers, alles wat waar is, alles wat edel is, alles wat reg is, alles wat rein is, alles wat mooi is, alles wat prysenswaardig is – watter deug of lofwaardige saak ook mag wees – daarop moet julle julle gedagtes rig.”; Rom 12:2: “… laat God julle verander deur julle denke te vernuwe”. As jy jou gedagtes verander, verander jou emosies en so ook jou lewe!
Joe Dispenza, ’n chiropraktisyn en die skrywer van Evolve your brain, was in ’n baie traumatiese fietsongeluk tydens ’n resies. Sy prognose was geweldig negatief. Twee operasies is aanbeveel, maar hy het daarteen besluit en gekies om sy gedagtes vir sy genesing in te span.
Hierdie nie-Christen het ’n paar lewenslesse ontdek wat ons as Christene gerus ter harte kan neem. In sy herstel het hy gefokus op die onderstaande drie pilare van gesond word, soos hy dit gestel het.41
’n Innerlike intelligensie gee ons lewe en kan die liggaam gesond maak
Hoe sê die Bybel? God het ons net minder as ’n goddelike wese geskape. Ons is immers die beeld van God!
Besef ons werklik met watter ongelooflike innerlike krag en vermoëns God ons geskape het? Jou hart klop 100 000 keer per dag sonder dat jy daaraan dink. Dit is 40 miljoen hartkloppe per jaar. Stop vir vyf sekondes, haal diep asem en lees dan verder.
Terwyl jy gestop het, het die volgende gebeur: Daar het presies 100 000 chemiese reaksies in elkeen van jou selle plaasgevind. Vermenigvuldig dit nou met die aantal selle in jou liggaam wat, terloops, tussen 70 en 100 miljard is. Die meeste van ons het nie eens ’n rekenaartjie wat hierdie som kan doen nie! Het jy daaraan gedink toe hierdie reaksies plaasgevind het? Nee. Dit is nie in die bewuste nie, maar in jou onbewuste. Ook maar goed dat ons nie daaraan hoef te dink nie, want ons kan nie eens die sewe items op ons inkopielys onthou nie!
As jy die DNS van al die selle in jou liggaam sou kon ontrafel, sal dit 150 keer na die son en terug strek; jou smaakknoppies in jou mond lewe net ’n paar uur; jou witbloedselle leef omtrent tien dae. Wetenskaplikes beweer dat omtrent 1% van jou selle daagliks vervang word; min of meer 30% per maand.42 Jy is dus, sover dit jou selle aangaan, omtrent elke drie maande ’n nuwe mens. Dit is dus nie snaaks dat dit omtrent drie maande neem om nuwe gedrag aan te leer nie. So kan ons aangaan. Genoeg, egter.
Ons het ’n intelligensie binne elkeen van ons wat groter is as wat ons ooit kan besef. Dit wys jou net wat God jou gegee het waarmee jy kan werk; waarmee jy jou daaglikse lewe, selfs jou gesondheid, kan verander! Jy wat soms so vreeslik onbekwaam en minderwaardig voel, geskapene-na-die-beeld-van-God!
