hierdie intelligensie wat God in jou geskape het begin gebruik, kan jou lewe heeltemal verander.
Joe Dispenza het begin navorsing doen oor wat gebeur met mense wat besluit om nie noodwendig die pille-en-operasie-roete vir gesond word te volg nie; hoe hulle dink, wat hul wysheid is. Hy het gevind dat hulle almal geweet het dat hul ingesteldheid en hul liggaam onlosmaaklik aan mekaar verbonde is. “They came to understand if they tapped into this intelligence (of the human being) and used their thoughts to direct it, it would know how to heal their bodies for them.” 43 Met die regte gedagtes kan ons nie net lewensvreugde en geluk beleef nie, maar ook ons lewe heeltemal verander en onsself selfs gesond maak!
Neuroplastisiteit en biologiese verandering in die liggaam
Nou eers ’n klein bietjie graad 8-biologie. Ek belowe ’n wêreld se insig sal vir jou oopgaan.
Eerstens: Dit is so dat baie van ons gedrag geneties vasgelê is (met ander woorde, dit is van ons voorouers geërf). Dit hoef egter nie verdoemend te wees nie. Die nuutste navorsing wys egter dat ons ons gene, sowel as breinselle, kan verander.44 Een van die wonderlikste ontdekkings in die laaste tyd handel juis oor die neuroplastisiteit van die brein, naamlik dat die brein verander kan word – in lekker Afrikaans, herbedraad kan word: “the ability to rewire and create new neural circuits at any age to make substantial changes in the quality of your life” 45; “Nerve cells that fire together, wire together”.46 Ons kan dus van alle ongesonde gewoontes of gedagtes wat ons van ons voorouers geërf het of wat ontstaan het as gevolg van ons verlede, ontslae raak deur ons brein nuut te bedraad. Jy kan alles verander en dié boek gaan jou wys hoe.
Waarom is dit dan so moeilik om daardie dinge, wat ons probleme veroorsaak, te verander? Daar is ’n eenvoudige antwoord: Elke keer dat ’n gedagte deur jou brein gaan, word chemiese stowwe afgeskei wat gevoelens en reaksies in jou liggaam laat ontstaan. Jou liggaam word so gewoond aan hierdie chemiese stowwe en wil dit altyd op daardie vlak hou. As jy dus wil verander, voel die liggaam erg ongemaklik omdat jy hierdie vlak van chemiese stowwe versteur. Jy is dus verslaaf – jy hoor reg: verslaaf – aan daardie emosionele toestand wat deur spesifieke chemiese stowwe in jou liggaam geskep is.47
Jou gedagtes het deur die jare jou brein sodanig bedraad dat dit baie moeilik is om jou ingesteldheid te verander en dus hierdie vlak van chemiese stowwe ook. Dit benodig baie aksie van jou kant af! Dit voel soos om op ’n vliegtuig te wees wat gekaap is. Jy is vasgevang in die sitplek en kan eintlik nêrens heen nie.
Die wonderlike nuus in hierdie boek is dat jy wel die vermoë het om uit te breek; die bedrading van jou brein te verander (neuroplastisiteit) sowel as die verslawing aan hierdie vlak van chemiese stowwe. Maar, dit gaan nie gebeur as jy nie iets daaromtrent doen nie. Die klem is op doen; op aksie; nie net daaroor lees nie. Selle en die brein moet herbedraad word om jou verslawing aan sekere chemiese stowwe te verbreek.
Tweedens: Elke gedagte produseer ’n biochemiese reaksie in die brein. Die brein stuur dan chemiese seine na die liggaam waar hulle dan as’t ware optree as boodskappers van die gedagte. Die gedagtes wat die chemiese stowwe in die brein geproduseer het, laat jou liggaam toe om presies te voel op die manier wat jy gedink het. “So every thought produces a chemical that is matched by a feeling in your body.” 48 As jy dus positiewe en gelukkige gedagtes het, sal jou brein chemiese stowwe afskei wat sal maak dat jy gelukkig, geïnspireerd en gemotiveerd gaan voel. Byvoorbeeld, as jy na iets uitsien wat jou gelukkig gaan maak, soos die besoek van iemand spesiaals, dan skei die brein ’n senuoordraer, dopamine, af wat jou opgewonde laat voel in afwagting van wat gaan gebeur.
Die teenoorgestelde is natuurlik ook waar. Indien jy kwaad is of onwaardig voel, skei die liggaam neuropeptiede (vergeet gerus dié groot woord!) af wat jou aaklig sal laat voel. Die oomblik dat jy voel jy is nie goed genoeg nie, onwaardig of wat ook al, skei jou brein chemiese stowwe af wat ’n gevoel van onwaardigheid laat ontstaan. Nou voel jy soos jy gedink het. Hoe meer jy hierdie gedagtes begin dink, hoe meer word jou brein so bedraad. Dit gaan op die ou end jou gesondheid en lewensgehalte bepaal.
“Ons moet onsself losmaak met behulp van ons verstand . . . vir die een wat sy verstand oorwin het, is sy verstand sy beste vriend; maar vir die een wat dit nog nie gedoen het nie, bly sy verstand sy grootste vyand.” – Bhagavad-Gita
Hierdie gedagtes kan ’n mens dus siek maak en dit is so belangrik om sulke negatiewe gedagtes uit te roei as jy ’n gesonde en gelukkige lewe wil lei. Dit gaan selfs verder. As jy pyn het en jy dink aanmekaar daaraan, dan word dit net erger. Jy kan egter daardie siklus verbreek, hierdie bedrading verander en minder aan die pyn dink. Die weë in die brein word dan nie versterk nie en die pyn kan dan selfs verminder of verdwyn.
Jy kan verander
Jy moet egter gaan sit, stil word en jouself begin afvra: “Wat sal gebeur as ek ophou om so ongelukkig, selfgesentreerd en negatief te wees en hoe kan ek verander? Wat as ek ophou om my altyd te bekommer, skuldig te voel, jaloers te wees, wraakgedagtes te koester?” Hierdie is die eerste stap na ’n nuwe jy. Jy is nou reg om jou brein te herbedraad as jy ’n eerlike, opregte voorneme het om dit wel te doen!
Daar is in 1995 navorsing gedoen wat wys watter ongelooflike vermoë die mens het om sy brein te herbedraad 49. In hierdie studie is individue lukraak geplaas om vas te stel hoe die aanleer van ’n musiekstuk die bedrading in die brein beïnvloed.
Die eerste groep het ’n musiekstuk geleer wat hulle met die een hand kon speel en hulle is toegelaat om dit vyf dae lank twee uur per keer in te oefen. Die tweede groep kon klavier speel soos hulle lus het sonder dat hulle die musiekstuk geleer het. Die derde groep het as toeskouers gesit en kyk hoe die eerste groep die stuk aanleer en dit in hul gedagtes gememoriseer en gevisualiseer. Daarna het hulle, sonder om aan die klavier te raak, twee uur per dag, vyf dae lank, die musiekstuk in hul gedagtes op die klavier gespeel. Die vierde groep was ’n kontrolegroep en het hoegenaamd niks gedoen nie.
Die ongelooflike uitslag van hierdie studie was dat die groep wat die stuk net gevisualiseer het (mental rehearsal, soos die Engelse sou sê), byna dieselfde verandering in die brein ondergaan het as die groep wat die klavier fisiek bespeel het! Byna dieselfde neurale netwerke is in die brein gevorm. Hulle het dus hul brein laat groei en verander bloot deur hul gedagtes! (In die neurowetenskappe staan dit as die Hebbiaanse leer bekend). Met toegewyde psigiese programmering van jou brein kan die brein nie onderskei tussen wat werklik gebeur of wat net in jou gedagtes gebeur nie.
Dit het geweldige implikasies vir ons: As jy dus toegewyd werk, kan jy nuwe weë in jou brein vestig; jy kan dus nuwe gedagtes aanleer soos om gelukkig te wees, positief te wees, vriendelik te wees, behulpsaam te wees, gesond te wees – oneindig baie ander moontlikhede. Die klem is egter daarop om dit toegewyd te doen. (Kyk later in die boek hoe ons FEED gaan inspan om die aanleer van nuwe tegnieke en vaardighede blywend deel van jou lewe te maak.) Soos ons reeds geleer het, as jy nie langer aan iets aandag gee nie, verloor dit sy doeltreffendheid, met ander woorde jou gevoelens van minderwaardigheid, negatiwiteit, woede, noem maar op, verminder werklik en gaan op die ou end weg. Soos ons Engelse vriende sou sê: “Nerve cells that no longer fire together, no longer wire together.”
Fokus, fokus, fokus!
Om te verander beteken eenvoudig net harde werk – iets wat baie van ons nie wil doen nie. Jy kan nie ’n suksesvolle sportman wees deur net af en toe te oefen nie. Tog wil ek en jy suksesvol en gelukkig wees deur net af en toe iets daaraan te doen. Wanneer ’n mens siek is, drink jy mos nie die voorgeskrewe medisyne net een keer nie? Tog wil ons verander deur iets net een keer te doen!
Die wete dat jy sekere dinge in jou lewe wil verander, is nie genoeg nie. Nee, meer is nodig: ’n passie om te wil verander, groot toewyding en om dan tyd te bestee om hierdie dinge te verander. Jy moet elke dag doelgerig optree in die velde wat jy wil aanpak. Om die vaardighede te bemeester is die truuk om jou brein anders te bedraad – ons
