vanaand in Genesis 29:31–35 van Lea se behoefte aan liefde en hoe dit in haar seuns se name uiting gevind het.
VRYDAG 8 FEBRUARIE 2013
Lees eers Genesis 30:1–13
Wedywering
“Gee vir my seuns, anders sterf ek” (Gen 30:1).
GESELSVRAAG: Aan watter soort kompetisie neem jy graag deel?
“Ek teen my broer; ek en my broer teen die ander kinders in die familie; ons familie teen die ander families; ons stam teen die ander stamme; ons volk teen die ander volke,” het ’n Arabier hul kultuur probeer verduidelik. Wedywering en stryd is die antwoord. Dit kon ook anders gewees het. Kan jy dink aan ’n manier waarop die verhouding tussen die twee susters, Ragel en Lea, byvoorbeeld heel anders kon verloop het? Sou hulle mekaar eerder kon ondersteun as om teen mekaar te wedywer?
Ons lees van heelwat huwelike in die Bybel waar meer as een vrou ter sprake is. En geeneen van hulle was gelukkig nie! Dit is so ver van die Bybelse ideaal van twee mense wat een word (Gen 2:24). Die oomblik dat daar ’n tweede vrou in die prentjie kom, is daar probleme. Veral in die Bybelse tye waar ’n vrou se waarde gemeet is aan hoeveel seuns sy in die wêreld gebring het. Vir Ragel het haar skoonheid niks beteken nie. Sy het geen kinders gehad nie. Sy was dus van geen waarde nie.
’n Mens se waarde word nie in geld, prestasies of kinders gemeet nie. As God jou sy kind gemaak het, is jy ’n prins of prinses. Jy het niks gedoen om dit te verdien nie. Uit genade word ons koningskinders. Ons waarde is meer as die hele wêreld se skatte. Jy kan die wêreld vandag vreesloos in die oë kyk.
GEBED: “Dankie dat U waarde aan elkeen van ons gee, Here.”
Lees vanaand in Genesis 30:14–24 meer oor die wedywering tussen die twee susters.
SATERDAG 9 FEBRUARIE 2013
Lees eers Genesis 30:25–43
Skelmstreke
“Die man het al hoe ryker geword. Hy het baie kleinvee, slavinne, slawe, kamele en donkies gehad” (Gen 30:43).
GESELSVRAAG: Hoe kan ’n mens op ’n eerlike manier ryk word?
“Boerdery is ’n wetenskap,” het ek vir myself gesê toe ek onlangs by ’n melkboer gekuier het en hy my gewys het hoe noukeurig rekords van elke koei gehou word. Jy moet presies weet wat met elke dier aan die gang is, en streng volgens ’n tydtafel werk. Elke koei moet elke 360 dae kalf of anders moet sy slagpale toe. Jy moet presies weet hoeveel liter melk elke koei lewer. Jy betaal ’n fortuin elke week aan voer vir die beeste en jy is onderdeur as hulle nie produseer nie.
Jakob se wetenskaplike boerderymetodes sal vandag se boere laat lag. “Dinge werk mos nie so nie,” noem ’n medestudent nadat hy hierdie gedeelte in sy stiltetyd raakgelees het. Tog het Jakob se skelmstreke die gewenste uitwerking gehad, en die wit skape het gevlekte lammers gekry. (’n Siniese persoon sal dalk ook nog wonder of daar nie ’n vreemde ram iewers in die prentjie was nie.) Jakob het steeds volgens sy naam, Skelm, gelewe. Dit was eers toe die Here sy naam na Israel verander het, dat hy ook verander het.
Ons kom almal in die versoeking om ons gewete so ’n bietjie tot ons voordeel te rek. Die groot vraag is egter nie wat ons daardeur sal wen nie, maar wat ons daardeur sal word. Oneerlikheid word uiteindelik uitgevang. Dit is altyd beter om bekend te staan as ’n man of vrou van integriteit, al is dit tot ons eie nadeel.
GEBED: “Here, maak my iemand met integriteit.”
Lees vanaand in Genesis 31:1–18 hoe Jakob en sy gesin besluit om weer na sy geboortedorp terug te gaan.
SONDAG 10 FEBRUARIE 2013
Lees eers Psalm 86:1–13
Leergierig
“Leer my u pad, Here, ek wil wandel in u waarheid; leer my U met toewyding dien” (Ps 86:11).
GESELSVRAAG: Wat wil jy nog graag leer doen?
“Sondagskool” het vir ons die gevoel van iets vir kinders. In ons volwasse kinders se gemeente in Wheaton, Illinois, is die Sondagskool ook vir die grootmense. Elke Sondag is daar ’n duisend volwassenes in die verskillende klasse om te leer oor sending of geloofsleer of om intensiewe vers-vir-versstudie van Bybelboeke te doen. Dit was vir ons ’n groot voorreg om in ’n klas van 200 te sit en die studie te geniet. Dit gaan nie net oor kopkennis nie, maar veral oor die toepassing van elke ding wat ons leer.
Dit is Dawid se groot begeerte in vandag se teksvers. Hy wil leer wat die regte ding is om te doen, met die doel om dit te doen! Hy wil daarvolgens wandel (lewe). Hy wil die Here met toewyding dien. En dit is beslis nie net op die rusdag nie, maar veral gedurende die res van die week. Lofprysing is ook ’n groot deel daarvan (v 12).
Miljoene mense is vandag op pad kerk toe om die Here te aanbid. Duisende preke sal gepreek word. Baie mense sal tot bekering kom. Maar dit is nie genoeg om net ’n bekeerling te wees nie – jy moet ’n dissipel wees (Matt 28:19). ’n Dissipel is ’n leerder – iemand wat elke dag die Here al hoe beter wil leer ken, sodat Hy ons lewe kan verander. Is jy ’n bekeerling of ’n dissipel?
GEBED: “Baie dankie vir die voorreg om na u Woord te luister, Here. Maak ons vandag en elke dag u dissipels.”
Lees vanaand Psalm 86:14–17 en kyk hoeveel daarvan jy as ’n Skrifgebed kan bid en dit bedoel.
MAANDAG 11 FEBRUARIE 2013
Lees eers Genesis 31:19–35
Draagbare gode
“Maar nou, as jy weggetrek het net omdat jy so baie verlang na jou familie, waarom het jy dan my gode gesteel?” (Gen 31:30).
GESELSVRAAG: Wat dink jy van gelukbringers?
“En nou mag ek nie eens meer vir ou Christopher saam met my dra nie!” het haar pa uitgeroep toe hy vies van die kerk af kom. ’n Hollandse katkisant in een van my vorige gemeentes het vertel dat hul priester in Holland baie evangelies was, en dit selfs gewaag het om teen beskermheiliges te preek. Haar pa het ’n medalje waarop St Christopher afgebeeld was in sy beursie gedra om veiligheid op die pad te verseker. En nou kon hy nie meer daarop vertrou nie!
Ragel het haar pa se huisgodjies gesteel sonder dat haar man daarvan bewus was. Hoekom het sy dit gedoen? Het sy hulle as gelukbringers beskou? Of dalk as afbeeldings van hul voorouers? Of wou sy haar pa leer om sonder bygeloof klaar te kom? Was sy dalk nog steeds heidens in haar gedagtes, sodat sy eerder op die afgodsbeeldjies vertrou het as op die onsigbare God? Hoe dit ook al sy, dit het amper haar lewe gekos.
Waar soek ons ons veiligheid as ons op pad gaan? Dit is altyd beter om eers saam te bid en die Here vir veiligheid te vertrou. Maak dit ’n tradisie in jul gesin. Laat jul kinders en gaste besef dat jul vertroue op die lewende God is, en nie op gelukbringers nie. ’n Dooie huisgodjie kan tog nie enige verskil maak nie. Maar as ons op hulle vertrou, is dit tot ons eie skade.
GEBED: “Here, ek vertrou op U alleen om ons vandag veilig te hou.”
Lees vanaand in Genesis 31:36–55 op watter Beskermer Jakob vertrou het. Hoe het hy en Laban hul ooreenkoms beseël?
DINSDAG 12 FEBRUARIE 2013
Lees
