hemel is.) Ander sou eerder die droom hê om soveel lewens moontlik te red.
“Gee vir my seuns, anders sterf ek,” het Ragel van Jakob geëis (Gen 30:1). Dit het vir haar oor haar eie eer gegaan. ’n Vrou sonder kinders, veral sonder seuns, is in haar tyd as niks gereken nie. Uiteindelik het sy vir Josef gehad, en tydens die tweede bevalling het sy langs die pad gesterf. Haar wens het letterlik waar geword. Met haar laaste asem het sy die kind Ben-Oni (seun van my smart) genoem. (Dit is deur hierdie geskiedenis dat die stad Benoni ook sy naam gekry het. Baie van die eerste inwoners was Jode uit Oos-Europa wat alles verloor het.) Jakob was egter nie tevrede dat die arme kind so ’n naam moes kry nie, en het hom eerder Benjamin (seun van my regterhand) genoem.
Jy het ook ’n passie. Hoe lyk dit in die lig van die ewigheid? Tel dit vir die hemel? Ons sal niks kan saamneem nie, behalwe mense wat ons na Christus gelei het. Dís vreugde!
GEBED: “Here, gee my ’n passie met ewigheidswaarde.”
Lees vanaand in Genesis 36:1–19 hoe Esau die stamvader van ’n groot volk geword het.
SONDAG 17 FEBRUARIE 2013
Lees eers Psalm 87:1–6
Kinders van Sion
“As die Here die name van die volke aanteken, sal Hy by elkeen skrywe: ‘Hierdie een is ook ’n kind van Sion’” (Ps 87:6).
GESELSVRAAG: In hoeveel lande is jul gemeente betrokke?
“Dit gaan nie oor ons nie,” moet ons gou leer. Ons is almal net deel van ’n veel groter prentjie. Ons gemeente is deel van nie net een kerkgenootskap nie, maar van die liggaam van Christus. Die kerk van Christus strek oor die hele aarde. Dit is in elke land op aarde te vind. Daarom moet ons help saamwerk sodat elke volk, taal en nasie van Christus moet hoor.
Hierdie psalm is waarskynlik gekomponeer om op pad na Jerusalem gesing te word. As die pelgrim naby die stad kom, en dit daar in die verte op die bergtop sien, was daar groot vreugde. Daardie stad se fondament is op die heilige berg. Dis waar God is. Die een volk na die ander sal Jerusalem as hoofstad erken. Maar Jerusalem in Israel is maar net die voorloper van die eintlike nuwe Jerusalem.
“Elkeen wat die oorwinning behaal, sal Ek ’n pilaar in die tempel van my God maak, en hy sal vir altyd daar bly. Ek sal op hom die Naam van my God skrywe en die naam van die stad van my God, die nuwe Jerusalem, wat van my God af uit die hemel uit afkom. En Ek sal ook my eie nuwe Naam op hom skrywe,” sê Jesus (Op 3:12). In Openbaring 21 lees ons meer van hierdie nuwe Jerusalem, wat plek sal hê vir verteenwoordigers uit elke stam en nasie. Vandag vier ons net die voorsmakie van daardie wonderlike erediens!
GEBED: “Here, wys my hoe ek onbereikte volke kan help bereik.”
Lees vanaand in Psalm 88:1–10 hoe ’n mens in tye van ernstige siekte kan bid.
MAANDAG 18 FEBRUARIE 2013
Lees eers Genesis 36:20–43
Goeie regering
“Daar het al konings oor Edom geregeer nog voor daar konings oor Israel geregeer het” (Gen 36:31).
GESELSVRAAG: Wat is die beste soort regering?
“Wat ons land eintlik nodig het, is ’n goeie diktator,” skerts ’n akademikus. Hy het opgelet dat demokrasie nie in Afrika werk nie. Die kiesers stem dan net hul eie stam in, sodat die grootste stam al die ander onderdruk. Hierdie selfsugtige gesindheid lei gou tot xenofobie en swak dienste. Dit gaan nie oor wat jy weet of doen nie, maar oor wie jy ken en wat jou afkoms is.
Anders as in ander lande waar die kinders van die koning gewoonlik hul pa opvolg, lees ons vandag iets nuuts. Die konings van Edom het uit verskillende dorpe gekom. Ons lees ook nie van staatsgrepe nie. Hoe is hulle dan gekies? Wie het hulle aangewys? Dit lyk nie of hulle naby familie van mekaar was nie. Dalk sou hulle ons ’n paar dinge kon leer.
In Afrika was daar nog min voorbeelde van leiers wat deur die stembus deur ’n beter regeerder opgevolg is. Die meeste leiers word gou diktators wat geen opposisie duld nie. Dan word hulle met geweld uit die kussings gelig, en dit kos gewoonlik duisende lewens. Ons moet dus bid vir ons eie regering, dat hulle die land met wysheid sal regeer, en dat die kiesers verstandige keuses sal maak. Bid vir die verkiesingskommissie wat moet toesien dat elke verkiesing oop en regverdig is.
GEBED: “Here, help ons regering om reg te regeer.”
Lees vanaand in Genesis 37:1–11 hoekom ons ons kinders eenders moet behandel en klagtes reg moet hanteer.
DINSDAG 19 FEBRUARIE 2013
Lees eers Genesis 37:12–27a
Regstellende geregtigheid
“Kom ons maak hom dood en gooi hom in ’n put” (Gen 37:20).
GESELSVRAAG: Wat is die oorsake van gewelddadige misdaad?
“Het hulle dan geen gewete nie?” is gevra nadat ekstremiste stralers geskaak en doelbewus in New York se grootste geboue vasgevlieg het. Die antwoord is waarskynlik: nee. Ons kultuur is gebou op reg en verkeerd. Die kulture van die Midde-Ooste is gebou op eer en skande. As jy skande op my volk en my godsdiens bring deur militêre oorheersing, moet ons ons eer en Allah se eer herstel deur geweld en weerwraak waar dit die vyand die seerste maak. (Die Afrika-kulture is weer gebou op mag – amandla – en vrees.)
Die kinders van Jakob kom ook uit die Midde-Ooste. Hul eer is aangetas deur die stories wat Josef aangedra het. Wie is dié snuiter dat hy kan dink hy gaan oor sy ouer broers regeer? En nogal oor sy ouers ook? Dit kan nie geduld word nie. Hul eer kan net herstel word deur Josef dood te maak, al pleit hy ook hoe hard (v 42:41). Ruben het hom probeer red (v 22) maar Josef is uiteindelik as slaaf na Egipte weggevoer.
In die laaste tyd word daar navorsing gedoen oor die redes vir ons land se hoë misdaadsyfer. Hoekom is daar soveel wrede en onsinnige moorde? Korrektiewe Dienste probeer gevangenes rehabiliteer deur “regstellende geregtigheid”. Die gevangene moet besef wat die gevolge van sy dade is, en die slagoffers om vergifnis vra. Slegs vergifnis kan die verhoudings herstel.
GEBED: “Here, wys my waar ek iemand om vergifnis moet vra.”
Lees vanaand in Genesis 37:27b-36 watter hartseer die seuns se optrede vir hul ouers gebring het.
WOENSDAG 20 FEBRUARIE 2013
Lees eers Genesis 38:1–11
Swaershuwelik
“Gaan na jou broer se weduwee toe, jou skoonsuster, en trou met haar, en sorg dat daar kinders gebore word vir jou broer” (Gen 38:8).
GESELSVRAAG: Hoe word weduwees in ons dag versorg?
“In hierdie land het vroue geen regte nie,” hoor ons in die Midde-Ooste. “’n Vrou mag nie motor bestuur nie; sy mag nie uitgaan tensy sy deur ’n manlike familielid vergesel word nie; sy moet gedurig swaar gesluier gaan; sy mag nie vir ’n inkomste werk nie. As sy ’n weduwee word, of geskei word, is daar vir haar geen uitkoms as sy nie familie het wat haar sal versorg nie. Dan moet sy uit prostitusie lewe of van honger doodgaan.”
In die tyd waarvan ons vandag in die Bybel gelees het, was dit nie veel beter nie. Daar is wel voorsiening gemaak dat ’n weduwee met haar swaer mag trou en dus versorg word, of
