is om hom te betaal! Dis nou nie juis baie geld nie, maar wat. Dis immers iets.
“Nou goed,” sê Apie, “gee vir my die geld!”
Saartjie weet hy sal nie ’n woord vertel voor hy die geld het nie.
“Ek is nou terug,” sê sy en is gou by die deur uit.
Apie tel die strokiesverhaal weer glimlaggend op. Vyf rand – en sommer net so! Dis nou vir jou maklik geld maak!
Saartjie is gou terug en gee die vyf rand vir hom. Hy steek dit dadelik in sy sak.
Saartjie kom sit weer op die stoel en sê: “Toe, vertel nou. Vertel alles wat jy gehoor het.”
Noudat hy die geld het, is Apie heeltemal gewillig om sy deel van die transaksie na te kom. Maar hy kan nie so mooi onthou hoe die gesprek tussen hul broer en ma begin het nie.
“Kris het daar ingekom,” sê Apie fronsend, “en oor allerhande goete gepraat … Ek weet nie meer watse goete alles nie …”
Saartjie besluit om liewer niks te sê nie en Apie maar op sy manier te laat vertel.
“Maar toe hy sê sy hart is gebreek,” gaan Apie aan, “het ek begin luister. Toe het ek geweet hulle weet nie ek is daar nie. Ek het oor die bank se agterkant geloer om te sien hoe ’n ou lyk wie se hart gebroke is, maar Kris het nie vir my anders as gewoonlik gelyk nie.”
Saartjie glimlag en sê: “En toe? Wat sê hulle toe?”
“Niks nie. Kris het net so stil bly sit en voor hom op die vloer gekyk en kort-kort sulke lang sugte gegee. En toe sien ek Ma sit haar hand so oor syne en sê: ‘Wat het gebeur, my seun? Vertel vir my.’ En toe begin Kris vertel.”
“Wat het hy vertel?” Saartjie skuif effens nader.
Apie vertel vir haar Kris het swaar gesug en gesê Isabel is nie meer sy meisie nie – sy het ’n ander kêrel. Dis ’n man van die stad en hy het ’n groot, blink kar.
“En toe sê hy iets wat hom amper laat huil het.”
“Wat was dit?” vra Saartjie.
“Hy’t gesê Isabel wil niks meer met hom te doen hê nie. Sy sien hom glad nie meer raak nie. Sy’s net heeltyd by die ou met die blink kar.”
Apie bly stil. Sy voorkop is ’n frons soos wat hy dink aan watter “goete” hy nog alles gehoor het.
“Ma het Kris probeer troos, maar hy wou nie getroos wees nie,” vertel Apie dan verder. “Hy het gesê hy sal in sy lewe nooit weer na ’n meisiemens kyk nie.”
“En wat nog?” vra Saartjie die ene ore.
“Is dit nie genoeg vir vyf rand nie?” wil Apie weet.
“Ja, seker,” sê Saartjie, “maar het hulle niks verder gesê nie?”
“Nee, nie juis nie. Hulle het toe sommer net so gepraat. Ma het gesê Isabel sal moeg raak vir die ou met die blink kar en weer na Kris toe terugkom en toe sê hy – dit was asof hy vergeet het hy’t gesê hy sal nooit weer na ’n meisiemens kyk nie – hy hoop dit sal so wees, want hy sal Isabel nooit kan vergeet nie, kos why, hy het haar lief. Dis wat hy gesê het.”
Apie kyk na Saartjie. Hy voel dis darem nou oorgenoeg vir vyf rand.
“Wie is die man?” vra Saartjie.
“Watter man?”
“Die ander ou – die een met die blink kar?”
“Nee, ek weet nie. Kris het nie sy naam gesê nie. Hy het net die hele tyd daar gesit en gesug en gesê hy kan nie verstaan wat Isabel in die ou sien nie, want almal weet hy’s ’n papbroek. En toe sê Ma …” Apie frons weer soos wat hy probeer onthou.
“Wat het Mamma toe gesê?” vra Saartjie dadelik.
“Ma het gesê Isabel is dalk agter die blink kar aan en nie die ou nie – en toe raak Kris kwaad en sê Isabel is nie só nie. So toe moes Ma maar weer keer en sê sy’s jammer en sy weet Isabel is nie só nie. Sy het dit glo net gesê oor sy teleurgesteld is, want sy hou so baie van Isabel. Toe sê Kris Isabel is wonderlik en toe sug Ma en sê ook Isabel is wonderlik.”
Apie het nou klaar gepraat. Hy voel hy het sy deel van die transaksie baie mooi nagekom. Saartjie het mos waarde vir haar vyf rand gekry. Hy loer na Die Skim. Hy wonder of sy strokiesheld daardie rower wat so stilletjies van agter af aangesluip kom betyds gaan raaksien.
“Is jy seker Kris het nie die man se naam genoem nie?” vra Saartjie.
“Ja.”
“Het hy ’n beskrywing van hom gegee?”
“Nee, hy het net gesê die ou het ’n blink kar en almal weet hy’s ’n papbroek.”
“Het hy gesê of die ou ’n snor het?”
“Nee, maar ek weet wat dink jy.”
“Wat dink ek?” vra Saartjie effens vies. Sy gaan duidelik niks verder uit Apie kry nie.
“Jy dink as hy ’n snor het, is hy ’n kroek!”
Saartjie kan nie help om te glimlag dat haar boetie haar so goed ken nie. Sy staan op en mik deur toe.
“Is jy nou tevrede?” vra Apie.
Saartjie is seker Apie het vir haar alles vertel wat hy gehoor het, maar sy sê: “Ek wonder of so ’n klein bietjie inligting vyf rand werd is.”
“Jy kan maar wonder,” sê Apie, “maar jy gaan nie jou geld terugkry nie.” Hy begin hom nou weer verdiep in Die Skim se wonderlike avonture.
In haar kamer sit Saartjie en dink oor alles wat sy gehoor het. Sy kry Kris baie jammer. Dit moet vreeslik wees om deur so ’n liefdesteleurstelling te gaan. Sy wonder hoe sy haar broer kan help. Sy wil hê hy moet Isabel terugkry, want hulle hou almal baie van haar.
Isabel en Kris is al jare lank meisie en kêrel. Hulle was altyd saam op hoërskool en albei was op die leerderraad in matriek. Toe is hulle saam universiteit toe, waar hulle nou nog saam is. Isabel Theron woon ook hier in Lynnekom. Almal het gedink sy en Kris gaan nog eendag trou.
“Die liefde is darem maar snaaks,” sê Saartjie hardop vir haarself. “Hulle was soveel jare saam en nou is hulle net skielik nie meer bymekaar nie.”
Saartjie besluit sy moet iets aan hierdie saak doen. Sy en haar vriendinne, Anna en Lina, moet die paartjie help om weer bymekaar uit te kom. Sy weet nog nie hoe nie, maar sy weet dit moet gedoen word!
Saartjie staar ingedagte by haar kamer se venster uit. Sy hou van die idee dat die Drie Muskiete vir Kris gaan help. Hulle moet seker maak Isabel neem nie weer notisie van die ou met die blink motor nie.
2
