op heterdaad. Hy konfronteer ons deurgaans met ons doen en late. Hy los ons nie as ons Hom wegjaag nie en Hy wag nie gedweë wanneer ons ons rug vir Hom draai nie. Hy meng in.
Dit is hoe sy bemoeienis met ons lyk. Sagaria noem dit “die genadige ontferming van ons God”. Goddank hiervoor. Want hoe lank sou dit duur voordat ons onsself en ons medemens vernietig? Hoeveel skade sal ons nóg aan die Koninkryk aanrig as Jesus ons nie voorkeer nie?
Dankie, dan, vir Johannes die seun van Sagaria en al die ander seuns en dogters vir wie God as padmakers inspan. Dit is hulle wat my help om Jesus raak te sien. Hulle leer my dat dit nie nodig is nie, en in elk geval tevergeefs is, om Hom te probeer vermy.
Dat sy vernaamste beweegrede is om my te verlos van my selfingeslane weg wat pylreguit op ’n afgrond afstuur.
____________________
Ek dank U vir die mense wat U oor my pad stuur. Ek hoor u stem in hul woorde, ek sien u hand in hul optrede.
Donderdag 30 JANUARIE 2020 Lees 1 Petrus 3:8-12
Luister na my, want …
“Bly weg van die kwaad af en doen wat goed is, soek vrede en jaag dit na!” (v. 11).
Petrus haal hier uit ’n Dawidlied aan, Psalm 34, wat in ’n swaar tyd geskryf is. Dalk het Dawid dit op ’n swaar manier geleer: Draai jou rug vir die kwaad, doen wat goed is. Soek vrede se spore, volg dit nougeset. Dalk was dit destyds ook maar moeilik, juis vir hom wat “’n man na God se hart” genoem word (vgl. 1 Sam 13:14; Hand 13:22).
Want dat goeddoen groot moeite vra, is ’n ongelukkige feit. En dat wegbly van die kwaad baie gevra is, eweneens. Met vrede soek waarskynlik die swaarste opdrag van almal – sodat ons dit oor die algemeen bitter moeilik vind om mense na God se hart te wees. Nee, eintlik onmoontlik.
Die vraag bly dan: Hoekom dié raad, hierdie opdrag, as Petrus (en Dawid) weet dat dit eintlik ’n onbegonne taak is? Moet ons Dawid se aangehaalde motivering – “as iemand die lewe liefhet en ’n lang lewe begeer” – ernstig opneem? En wat van sy alwetende belofte: “Die Here sorg vir die opregtes en luister na hulle hulpgeroep”? En daardie kille dreigement: “Hy tree op teen dié wat kwaad doen”?
Dalk moet ons tóg maar noukeurig hierna luister, juis omdat dit Dawid is. Ook omdat dit Petrus is wat dit hier weer ophaal. Want nóg Dawid nóg Petrus was uitblinkers in goeddoen en kwaad vermy en vrede najaag; die Bybelse getuienis hieroor is trouens nogal verdoemend.
Daarom is hul uitsprake waarskynlik minder triomfantelik as wat ons dink; dit is eerder vol onthou. Daarom is daar straks minder uitroeptekens in hul vermanings en meer trane. So hoor ons hoe hulle sug: Luister maar, want ek was daar.
____________________
Ek hoor, Here, ek hoor …
Vrydag 31 JANUARIE 2020 Lees 1 Timoteus 5:17-24
Doendinge
Ek beveel jou … om jou aan hierdie voorskrifte te hou … (v. 21).
Paulus is vol praktiese raad vir sy jong leerling: Maak sus en so in die gemeente; pasop vir dit en dat en die ander ding. Hy deel selfs ’n gesondheidwenk uit ter wille van Timoteus se “herhaalde ongesteldhede”: Drink minder water, jong man, en meer wyn!
Deurentyd kry die latere leser die idee dat Paulus goed weet waarvan hy praat. Dat hy sy vriend en kollega allerlei skade en skande, wat hy dalk self oorgekom het, probeer spaar. Ook dat daar vele “moenies” op die pad van leierskap opdoem.
Ten slotte blyk die rede vir sy waarskuwings duidelik: sonde, teenoor goeie dade. En hoe onafwendbaar dit is dat alles uiteindelik aan die lig sal kom. Almal weet dit, Timoteus. En as hulle dit nog nie weet nie, sal hulle dit spoedig uitvind. Doen dus wat jy weet reg is.
So gaan dit met evangeliedienaars – dit is nou dié wat dit as ’n voltydse beroep beoefen én diegene wat dit as hul roeping-tussen-vele-ander-verpligtinge beskou: Daar word dinge gedoen. Ja, Christenwees is ook wéés, maar Christene word behoorlik uitgeken aan wat hulle uitrig. Liefde is immers ’n werkwoord, en barmhartigheid is geen teoretiese saak nie. Leierskap vra voorvat en vasvat, en ’n volgeling van Jesus is ’n opteller-en-draer, ’n trane-afdroër, ’n voorbidder en ’n voetewasser.
Dit is daarom dat Paulus se raad so eenvoudig en op die man af is, so haalbaar, doenbaar. En sy waarskuwings oor sonde, ook dié wat weggesteek word, so onheilspellend. Hy wil maar sê: Jou doen en late het ’n aantoonbare invloed in Christus se kerk en koninkryk. Oorweeg dus goed wat jy moet doen en wat jy moet los, en spring dan aan die werk.
____________________
U wys my so duidelik wat ek moet doen, Here. Gee my die moed om gehoorsaam te wees.
Saterdag 1 FEBRUARIE 2020 Lees Psalm 15
Sy heilige berg?
Hy wat onberispelik wandel en doen wat reg is … (v. 2).
Hier het ons daardie bekende retoriese vrae wat dikwels as ’n votum voor ’n erediens gebruik word: “Wie het die reg om in u woonplek te kom, Here? Wie mag op u heilige berg vertoef?” Dié vrae is bloot die aanleiding tot die breedvoerige antwoord: Die onberispelikes, die waarheidpraters, die model-medemense, die eersteklasgelowiges – dit is húlle wat tot by God mag kom.
Kyk jy na die volledige lysie kwalifiseerders, dan wéét jy: Die kanse dat jy aan hierdie eise voldoen, is skraal. Onmoontlik.
Op hierdie eerste dag van die tweede maand in die nie-meer-so-nuwe-jaar, op die vooraand van die Sondag, moet ongeveer almal hoor dat hulle nie in “God se woonplek” mag kom nie. Dat sy “heilige berg” vir hulle gesluit is.
Nou kan ons ons slim hou en allerhande vrae vra oor waar God se woonplek of sy heilige berg dan nou is, en allerlei opmerkings maak oor die Nuwe-Testamentiese kerkbegrip en God se onbetwyfelde teenwoordigheid by ons … en die punt volledig mis. En dit is dat Godskinders hul plek moet ken.
God se kinders moet weet dat Hy nie hul speelmaat is nie. Nie ’n skadelose ou omie met ’n wit baard nie. Hy is heilig. “Hy alleen besit onsterflikheid; Hy woon in ontoeganklike lig” (1 Tim 6:16). Sy kinders word nie in dieselfde asem as Hy genoem nie.
Dat Hy hulle voor sy oë duld, is bitter vreemd. Dat Hy hulle liefhet, is totaal onbegryplik. Dat Hy dit alles boonop sonder voorwaardes doen, is ’n wonderwerk sonder weerga. Dat Psalm 15 se harde waarhede in bloed verdrink het wat van ’n kruis op ’n onheilige heuwel genaamd Kopbeenplek afgestroom het – dít is die verstommende evangelie.
____________________
Ek staan voor U omdat Jesus gekruisig is. Ek loof u Naam!
Sondag 2 FEBRUARIE 2020 Lees Miga 6:1-8
Jy weet dit mos
Mens, die Here het jou bekend gemaak wat goed is … (v. 8).
Hier word ’n boeiende tweegesprek tussen die Here en sy volk gevoer: Hy kom met ’n aanklag; die volk vra wat hulle Hom moet betaal sodat Hy hulle kan vergewe. Dan antwoord Hy dat hulle dit goed weet: Laat reg geskied, bewys liefde en trou, lewe bedagsaam.
Dit
